Stel jou voor jy maak jou kredietverslag oop en vind ‘n vreemdeling se skuld onder jou naam gelys, of nog erger, jy word ‘n lening geweier bloot omdat jou naam verkeerd op jou kredietverslag gespel is! Hierdie is werklike probleme wat kan voortspruit uit onakkuraathede op jou kredietverslag. Gevolglik meen kenners dit is ‘n goeie gewoonte om gereeld jou kredietverslag te monitor. Met hierdie proaktiewe benadering kan geringe foute geïdentifiseer en reggestel word asook beskerming teen identiteitsdiefstal bied. Kyk gerus uit vir die volgende gereelde foute.
- Betalings verkeerd uitgebeeld:
Soms word ‘n onakkurate beeld van ‘n persoon se betalingsgeskiedenis weergegee. Dit beteken dat laat- of gemiste betalings aangeteken is terwyl dit op tyd betaal is. Maak dus seker dat betalingsdatums korrek weergegee word.
- Afgehandelde rekeninge wat steeds ‘n balans toon:
Dit mag voorkom dat ‘n rekening ten volle afbetaal is, maar op die kredietverslag steeds ‘n ongunstige saldo toon. Verseker dat afgehandelde rekeninge wel so op jou kredietverslag aangedui is.
- Rekeninge Ouer as 7 Jaar:
Let wel dat rekeninge ouer as 7 jaar nie meer op jou kredietverslag behoort te verskyn nie.
- Gemengde Kredietverslag:
Dit mag gebeur dat ‘n ander persoon se inligting op jou kredietverslag verskyn, veral wanneer hy/sy ‘n naamgenoot is. Maak seker dat elke rekening wat op jou kredietverslag verskyn wel jou eie is. Hierdie gevalle mag onskuldige foute wees, maar dit kan in sekere gevalle op identiteitsdiefstal dui.
- Identiteitsdiefstal:
Verdere indikasies van identiteitsdiefstal op jou kredietverslag sluit in foute wat eweskielik op jou persoonlike besonderhede soos naam en adres voorkom, ongemagtigde kredietnavrae, en rekeninge vir onbekende aankope. Daarbenewens kan afwykings in rekeningsaldo’s of kredietlimiete ook voorkom.
Jy het die reg om enige onakkuraathede op jou kredietverslag te betwis deur die saak aan die kredietburo – soos XDS – deur te gee. Foute moet skriftelik uiteengesit en met ondersteunende dokumente gestaaf word. Nadat die kredietburo die dispuut ondersoek het, sal hulle met die nodige inligtingsverskaffer koördineer om enige onakkuraathede reg te stel. Nietemin, die aanbeveling is dat mens elke 6 maande jou kredietverslag noukeurig moet nagaan om seker te maak dat als in orde is.
Bronne geraadpleeg:
Singer, A. (2024). Why you should regularly check your credit report. Forbes. https://www.forbes.com/sites/forbesfinancecouncil/2024/02/06/why-you-should-regularly-check-your-credit-report/
Consumer Financial Protection Bureau. (2023). How do I dispute an error on my credit report. https://www.consumerfinance.gov/ask-cfpb/how-do-i-dispute-an-error-on-my-credit-report-en-314/#:~:text=If%20you%20identify%20an%20error,documents%20that%20support%20your%20dispute.